كتبها:Green eyesأخراج: crestthebest & Malak
موضوع الحلقة : التجنيس
نزار من مواليد البلاد ( البلاد اللي هي المدن و القرى الفلسطينية اللي احتلوها اليهود سنة 1948)
و كانت عيلة نزار عيلة كبيرة و الها سمعتها و من اكبر العائلات بالبلد و كان عندهم اراضي و املاك ..
انولد نزار سنة 1947 يعني ما لحق يتهنى ب املاك عائلته
و كان الولد التالت لابو صالح , صارت حرب 1948
و اتهجرت الناس و راح بعض من افراد العائلة ع مخيمات غزة,
كبر نزار و تعلّم ب مدارس الوكالة
و كان يشتغل بعد المدرسة بالفرن تاع ابوه لأنو ابوه كان مريض و ما بيقدر يشتغل ,,
كان نزار ولد كتير شقي و ذكي و جدع و مشكلجي من يوم يومو و مع هيك كان محبوب من الناس لرجولته من صغرو و الصبايا لأنو امور ..
و بلا طولة سيرة صار عمر نزار 17 سنة
و يا دوب كان مخلص توجيهي و صار لازم يدرس بالجامعة ,,
بس كيف يدرس بالجامعة و هو اللي بيشتغل و بيصرف عالعيلة ؟
نزار : يابا بدي اكمل تعليمي.
ابو صالح : يابا و كيف بدنا ناكل خبز من بعدك ؟
خلص خلي اخوك الكبير يتعلم و انت خليك معنا ما النا غيرك و لا تنسى اخوتك الزغار.
نزار ( مع حرقة بقلبو ) : امرك يابا.فـفضل انو اخوه الكبير يدرس ب مصر و هو يصرف عالعيلة و ع اخوه اللي بـمصر ,
و صارت حرب 1967 ووقتها كان صالح مخلص جامعتو و راح عالامارات,
ابو صالح خاف ع نزار و اختهم دلال من اليهود لأنها كانت صبية,
ابو صالح : نزار قوم يابا بسرعة و جهّز حالك و اطلع ع مصر.
نزار : شو في يابا شو صاير
ابو صالح : اليهود رح يخشو المخيم و يلمو كل شباب الحارة و الله يستر ع بناتنا و عرضنا , قوم انت و اختك و اطلعو من هون بسرعة.
ام صالح : يما نزار ديرو بالكو ع بعض و خد هالدهبات بيعهم و دبرو حالكم ,,
ام صالح شلحت سنسال رفيع و خاتم بسيط و هاد كل اللي كان حيلتها .
و مع دموع الام و الاب طلعو نزار و دلال من المخيم و همي حاملين كل ذكرياتهم معهم.
بيوم و ليلة كان مطلّعهم من غزة على مصر و بعدين عالاردن بعدين عالعراق بعدين عالامارات عند اخوهم الكبير اللي كان استاذ مدرسة.
و بما انو نزار ما عندو غير التوجيهي صار يشتغل عامل بالميناء
و اشتغل عامل بناء و ما خلى شغلة تعتب عليه و اشتغل بشركات و تعلّم و اخد خبرات و مع الوقت كبر مركزو استلم ادارة شركات اجنبية كتيرة و كانو معجبين فيه كتير.
بعد عمر طويل حوالي 40 سنة بالامارات,
سمع نزار قانون بيسمح لكل شخص الو فوق 35 سنة انو يحصل عالجنسية الاماراتية.
و بما انو نزار يعتبر من النازحين سنة 1967 و ما عندو هوية و مافي امكانية انو يرجع يدخل فلسطين ففضّل انو يقدّم عالجنسية مشان يضمن مستقبل ولادو .
و قدّم عالجنسية و صارلو مقدّم تقريبا 6 سنين و لهلأ ما حكو معه و بيستنى الفرج.
و غيرو من الجنسيات حصلو عليها و ناس اصلا كانو بدون جنسية و حصلو عليها .
و بما انو حقوق المواطن غير حقوق الوافد ف هو حاسس انو انظلم و ولادو انظلمو معه.
بس عزاء نزار الوحيد هو ولاده ,,
اللي رباهم عالاعتماد عالنفس و يكونو قد حالهم. مع انو نزار هو أحقّ واحد بالجنسية لأنو خدم بالبلد و ولادو انولدو و اتعلّمو فيها .
جاء في الاعلان العالمي لحقوق الانسان...
المادة 1
المادة 1
يولد جميع الناس أحراراً متساوين في الكرامة والحقوق، وقد وهبوا عقلاً وضميراً وعليهم أن يعامل بعضهم بعضاً بروح الإخاء.
المادة 2
لكل إنسان حق التمتع بكافة الحقوق والحريات الواردة في هذا الإعلان، دون أي تمييز، كالتمييز بسبب العنصر أو اللون أوالجنس أو اللغة أو الدين أو الرأي السياسي أو أي رأي آخر، أو الأصل الوطني أوالاجتماعي أو الثروة أو الميلاد أو أي وضع آخر، دون أية تفرقة بين الرجال والنساء. وفضلا عما تقدم فلن يكون هناك أي تمييز أساسه الوضع السياسي أو القانوني أو الدولي لبلد أو البقعة التي ينتمي إليها الفرد سواء كان هذا البلد أو تلك البقعة مستقلا أوتحت الوصاية أو غير متمتع بالحكم الذاتي أو كانت سيادته خاضعة لأي قيد من القيود
